2026 жылғы 25 ақпанда Азаматтық қорғаныс жоғары көпсалалы колледжінде «Конституциялық өзгерістер: не үшін және қалай қабылданады» тақырыбында панельдік пікірталас өтті. Кездесудің бастамашысы әрі модераторы Азаматтық қорғаныс кафедрасының меңгерушісі, АҚ полковнигі Кадыров Рамазан Татжанович болды. Іс-шара оқытушылардың құқықтық мәдениетін арттыру және Қазақстан Республикасындағы конституциялық үдерістерді тереңірек түсіндіру мақсатында ұйымдастырылды.
Пікірталас барысында қатысушылар Конституцияның мемлекеттің негізгі заңы ретіндегі маңызын жан-жақты қарастырды. Ол қоғамдық құрылыстың іргелі қағидаттарын, мемлекеттік билік жүйесін және азаматтардың құқықтарын айқындайды.
АҚ полковнигі Кадыров Р.Т. конституциялық реформалардың жай ғана заңдық рәсім емес, демократиялық институттарды нығайтуға, құқықтық мемлекетті дамытуға және билік органдарының қоғам алдындағы жауапкершілігін арттыруға бағытталған қоғамдық сұраныстың көрінісі екенін атап өтті. Ол өз сөзінде түзетулер енгізу тетіктеріне, Парламент пен республикалық референдумның рөліне, сондай-ақ мұндай шешімдердің ашықтығы мен заңдылығы қағидаттарына кеңінен тоқталды.
Ашық диалог форматында оқытушылар сұрақтар қойып, конституциялық өзгерістердің білім беру жүйесі үшін практикалық маңызын талқылады, сондай-ақ білім алушылардың белсенді азаматтық ұстанымын және заңға құрметін қалыптастырудағы оқытушылардың рөлі жөнінде пікір алмасты.
